جدول المحتويات
معكرونة بالعدس والصوص الأحمر (بولونيز نباتي بدون لحمة)
المكونات:
• معكرونة مسلوقة (أي نوع تحبه)
• عدس مغسول ومنقوع 6 ساعات
• بصل مفروم
• توم مفروم
• جزر مبشور
• كرفس أفرنجي (لو متاح)
• عصير طماطم أو طماطم مفرومة
• صلصة طماطم
• ملح – فلفل – معلقة صغيرة سكر
• ريحان أو زعتر
• كمون
• شطة مجروشة حسب الرغبة
• معلقة كبيرة خل
• بودرة مرقة خضار (اختياري)
• بقدونس مفروم
• إضافات اختيارية: فلفل أخضر (حلو أو حار) مفروم، مشروم مفروم
الطريقة:
1. نشوح البصل، الجزر، والكرفس لحد ما يطروا.
2. نضيف المشروم ونقلبه 2 دقيقة، بعدين نضيف التوم والفلفل الأخضر ونقلب.
3. نضيف صلصة الطماطم، عصير الطماطم، مرقة الخضار، ونقلب كله مع بعض.
4. نزود شوية ميّه سخنة ونسيب الخليط يغلي. (لو حابب تبسط، ممكن تستغنى عن الخضار كلها وتعمل الصوص بالطماطم والبصل والتوم بس).
5. نضيف العدس والبهارات، ونسيبها على نار هادية لحد ما العدس يستوي تمامًا.
6. نقلب المكرونة مع الصوص، ونضيف البقدونس، أو نقدّم المكرونة بالصوص ورشّة بقدونس على الوش، والباقي جنب الطبق
سلطة بطاطس مشطشطة
لو الفلفل الأحمر كان بارد، يبقى مش مشطشطة
تفتح النفس ومشهورَة في مطاعم الفطير الشرقي… جربها بجنب ساندوتش كبدة إسكندراني وهتبقى تحفة!
المكونات:
• بطاطس مقشرة ومقطعة مكعبات صغيرة
• 2 معلقة هريسة فلفل أحمر
• معلقة صغيرة توم مفروم
• ملح – فلفل – كمون – كسبرة ناشفة – كركم
• خل
• زيت
• خضرة مفرومة (بقدونس، شبت، كزبرة) – ممكن تستخدم الكزبرة بس لو حبيت
الطريقة:
1. نسلق البطاطس نص سَلقة (3/4 سلقة)، وبعدين نصفيها.
2. في بولة كبيرة، نخلط الهريسة مع التوم والملح والبهارات والخل والزيت والخضرة.
3. أول ما البطاطس تكون سخنة، ننزلها على الصوص ونقلب كويس.
4. نسيبها تشرب الصوص حوالي ربع ساعة.
تتقدم بجنب ساندوتش كبدة إسكندراني، وبالهنا والشفا
فول مبخر
المكونات:
• علبة فول
• بصلة مفرومة
• حبة طماطم مكعبات
• فلفل بارد مقطع صغير
• فلفل حار (اختياري)
• معلقة كبيرة بقدونس مفروم
• معلقة كبيرة صلصة طماطم
• معلقة كبيرة طحينة
• معلقة صغيرة كمون
• فلفل أسود – كزبرة – ملح
• زيت زيتون
• فحمة للتبخير
• للتزيين: بصل – طماطم – فلفل بارد – بقدونس – طحينة – زيت زيتون
الطريقة:
1. في طاسة على النار، نحط زيت الزيتون والبصل ونشوّحه شوية، نضيف الطماطم والصلصة والفلفل ونسيبهم يتسبكوا.
2. ننزل بالفلفل الحار والبقدونس ونقلب.
3. نضيف الفول ونسيبه يسخن، وبعدها نهرسه في الخلاط أو بالشوكة.
4. نرجّعه على النار ونضيف الطحينة، الكمون، الفلفل، الكزبرة، الملح، وربع كباية ميّه، ونسيبه يغلي 5 دقايق.
5. نسخن فحمة، ونحطها في طبق فيه نقطة زيت فوق ورقة فويل، ونغطي الحلة علشان الفول يتبخر وياخد طعم الفحم.
6. نصب الفول في طاجن أو فخارة ونزينه بالبصل والطماطم والفلفل والبقدونس وشوية زيت زيتون وطحينة.
عدس بجبة
المكونات:
• ¼ كيلو عدس بجبة
• عصير 4 طماطم
• 4 فصوص توم مفروم
• ملح – كمون
• معلقة زيت
• معلقة سمنة أو زبدة
الطريقة:
1 نسلق العدس في ميّه متوسطة لحد ما يستوي.
2 في حلة تانية، نحط الزيت والسمنة ونشوح التوم لحد ما يصفر.
3 نضيف عصير الطماطم ونسيبها تتسبك.
4 نحط الملح والكمون، ونضيف العدس بالميّه بتاعته.
5 نسيبهم يغلوا 10 دقايق على نار هادية.
بيتقدم مع طبق طماطم متبّلة أو طاسة طماطم بفلفل حار
كباب الغلابة مع بطاطس مدخنة
طبق جانبي بسيط وسهل… بس الطعم بيخليك تعشق كل لقمة!
المكونات:
• بطاطس محمرة أصابع (أي كمية بتحبها)
• بصلة جوانح
• خضرة مشكلة (بقدونس + كزبرة + شبت)
• ملح وفلفل أسود
• ظرف مرقة دجاج فورية
الطريقة:
1 في بولة كبيرة، نحط البصلة مع الخضرة والملح والفلفل وظرف المرقة، وندعك المكونات كويس جدًا.
2 ننزل عليهم بالبطاطس المحمرة سخنة، ونقلب كويس لحد ما البطاطس تتشرب التتبيلة.
3 نسخن فحمة على النار، ونحطها في نص البولة مع نقطة زيت.
4 نغطي البولة بإحكام (غطا أو ورق فويل) ونسيبها 10 دقايق علشان البطاطس تاخد نكهة الدخان.
ممكن تقدمها كطبق جانبي أو تعمل منها ساندوتشات طعمها تحفة!
الكشري الأصفر المصري
المكونات:
• 2 كوب رز
• 2 كوب عدس أصفر
• ملح – كمون
• مكعب مرقة (اختياري)
• أو: رشة توم بودر + بصل بودر + كركم لتعزيز الطعم واللون
• 3 معالق كبار زيت أو سمنة
الطريقة:
1. نغسل الرز والعدس مع بعض تحت الميه لحد ما تبقى صافية، وبعدين نصفيهم كويس.
2. في حلة على النار، نحط السمنة أو الزيت يسخن، ونضيف الرز والعدس ونقلبهم شوية.
3. نتبّلهم بالملح والكمون (ولو حابب تضيف مرقة أو توابل بديلة).
4. نضيف ميّه تغطيهم بسيط، ونسيبهم يستووا على نار هادية لحد ما يشربوا الميّه ويستوي الرز.
التقديم:
بيتقدم مع بيض مسلوق ومتحمّر و طماطم متبلة (مخلل طماطم) أو بتنجان متبل أو مقلي وبصل الكشري المقرمش عالوش
الشكشوكة
المكونات:
• 4 بيضات
• 2 معلقة كبيرة زيت زيتون
• بصلة متوسطة مفرومة
• 2 فص توم مفروم
• فلفلة رومي مقطعة صغير
• 2 طماطماية مفرومين أو علبة طماطم مهروسة
• ملح – فلفل – رشة كمون (اختياري)
• بقدونس مفروم للتزيين (اختياري)
الطريقة:
1. في طاسة سخنة، نحط زيت الزيتون وننزل بالبصل ونقلبه لحد ما يدبل ويصفر.
2. نضيف التوم والفلفل ونقلبهم كمان شوية لحد ما الفلفل يطرى.
3. ننزل بالطماطم ونحط الملح والفلفل والكمون، ونسيبها تتسبك على نار هادية حوالي 10 دقايق.
4. نعمل فتحات صغيرة في الصلصة، ونكسر البيض فيها، ونغطي الطاسة.
نسيب البيض يستوي على مزاجك: تحب الصفار سايل؟ ولا ناشف؟ أنت حر.
5. نزين بالبقدونس المفروم، ونتقدمها سخنة مع عيش بلدي أو شباتي
خبز الجبنة
المكونات:
• 3 بيضات + صفار بيضة
• كوب حليب
• كوب زيت
• كوب زبادي
• كوب جبنة قريش
• فلفلة خضرا مقطعة ناعم
• بطاطساية مسلوقة ومهروسة
• فص أو اتنين توم مفروم
• معلقة كبيرة هريسة
• معلقة صغيرة ملح
• معلقة كبيرة بيكنج بودر
• 2 ونص كوب دقيق (يزيد أو يقل حسب القوام)
الطريقة:
1 نخفق البيض مع الحليب والزبادي والزيت.
2 نضيف الدقيق والبيكنج بودر والثوم والبطاطس المهروسة.
3 ننزل بالفلفل والهريسة ونقلب، وبعدين نضيف الجبنة والملح ونخلط كله كويس.
4 نصب الخليط في طاجن مقاس 40 سم، ونرش على الوش رشة كمون أسعد (أو كمون عادي).
5 ندخله فرن سخن لحد ما ياخد لون دهبي يفرّح القلب